Contacto: parquecaninobarreiro@gmail.com
Vigo – A comunidade de Lavadores, cun espírito colaborativo e desexo de mellorar o seu contorno, suxire que a proposta do Concello sobre o parque canino de Barreiro podería beneficiarse dunha análise conxunta. Os veciños, coñecedores das necesidades específicas da zona, veñen de achegar as súas ideas para optimizar o deseño e a funcionalidade deste novo espazo. Esta actitude busca asegurar que o parque canino de Barreiro se adapte perfectamente ás necesidades tanto dos cans como dos seus donos, contribuíndo así ao benestar xeral da comunidade e ao enriquecemento da vida de Lavadores e de Vigo.
Vigo é a cidade galega con maior poboación canina con 48.170 cans rexistrados. Lavadores, onde se situa o parque canino de Barreiro, conta con 17.442 habitantes e unha notable presenza de animais de compañía. Estímase que hai 2.907 cans nesta zona, seguindo a proporción xeral da cidade de un can por cada seis habitantes, aínda que é probable que a cifra real sexa superior debido a maior concentración de cans nesta zona do extraradio.
Neste contexto, un grupo de veciñas e veciños presentou unha proposta para optimizar o proxecto do Concello, co obxectivo de que o novo parque canino non só beneficie aos que teñen cans, senón a toda a cidadanía, creando un espazo que fomente a convivencia equilibrada e a integración.
Enlace para descargar a proposta da veciñanza en Lavadores (documento en .pdf):
https://drive.google.com/file/d/1aVrX1wxk0YzLyUGPS8EE94aqRC3-IMV9/view?usp=sharing
Por un parque canino en Barreiro que de verdade beneficie a todos: as familias con cans e a cidadanía.
Unha proposta para enriquecer o proxecto municipal, un parque canino máis amplo e mellor ubicado.
A proposta, para enriquecer a proposta do Concello para o parque canino de Barreiro, foi entregada hoxe a través do rexistro municipal acompañada de sinaturas de familias con cans de residentes en Barreiro. Esta iniciativa xorde da preocupación polas dimensións e a localización do parque proposto polo Concello, que consideran inadecuadas para atender as necesidades reais dos cans e as súas familias.
Aspectos da proposta do Concello relativos ao tamaño e á localización: un enfoque para a súa optimización
Tras unha análise detallada da proposta do Concello, identificamos algúns aspectos que nos xeran dúbidas e que poderían ser revisados para garantir que o parque canino responda de xeito óptimo ás necesidades da comunidade e se integre respetuosamente no entorno.
Tamaño, unha avaliación das necesidades reais: Co número actual de familias con cans na zona e o seu constante crecemento, un parque así quedaría pequeno dende o primeiro día. Un parque dese tamaño non só limitaría o espazo para correr e xogar, senón que tamén aumentaría o risco de pelexas e de estrés nos animais. Os cans precisan espazo para moverse libremente, explorar e relacionarse sen sentirse agobiados. Nun parque pequeno, a convivencia podería resultar complicada, e moitas familias acabarían por non utilizalo debido aos posibles conflitos. De feito, é probable que un parque canino así xere máis problemas dos que soluciona. Sería conveniente valorar un espazo máis amplo para garantir unha mellor experiencia para todos.
Localización non axeitada: O parque situaríase nunha zona de paso moi concorrida, o que podería ser incómodo tanto para as familias con cans como para o resto da veciñanza. Ademais, a localización proposta está pegada a unha área deportiva, cun ruído de música molesto para os cans, cuxa sensibilidade auditiva é maior. Sumado a isto, a proximidade á estrada suporía un risco adicional no caso de que algún can se escapase. Por outra banda, pensamos que sería interesante reconsiderar a elección deste espazo, xa que actualmente está acondicionado e utilizado pola veciñanza como zona de lecer. O noso obxectivo é que o parque canino sexa un espazo ben integrado na contorna e beneficioso para todos.
En resumo, Identificamos na proposta do Concello unha oportunidade para mellorar o tamaño e a localización do parque canino, o que permitiría maximizar a súa funcionalidade e a súa seguridade.
As vantaxes da nosa proposta: un parque canino pensado para o benestar dos cans e o confort da cidadanía
Propoñemos aproveitar unha zona máis ampla e pouco utilizada do Parque de Barreiro para crear un parque canino que realmente funcione e que beneficie a todos:
Un tamaño axeitado para as familias con cans: A nosa proposta inclúe un espazo de 2200 m², que consideramos o mínimo necesario para que o parque canino sexa funcional. Este tamaño permitiría que os cans corran, xoguen e socialicen sen aglomeracións, reducindo o estrés e o risco de pelexas. Ademais, un parque máis grande permite unha mellor distribución dos cans, con zonas para o xogo activo e zonas máis tranquilas para o descanso. Tamén garante que o parque non quede pequeño dende o seu inicio e adaptarse ao crecemento futuro da poboación canina. Un parque máis grande tamén facilita o mantemento e a durabilidade do terreo, evitando o desgaste excesivo do chan.
Unha localización tranquila e segura, respectuosa co entorno: A zona que propoñemos está máis afastada do ruído da area deportiva e da estrada, o que garante a tranquilidade e a seguridade dos cans. Ademais, esta zona non interfire coas actividades doutros usuarios do parque, xa que se trata dun espazo pouco utilizado na actualidade. De feito, esta zona xa é utilizada de forma espontánea por moitas familias para pasear e xogar cos seus cans, o que demostra o seu potencial como parque canino. Ademais, a localización que propoñemos xa conta con algúns elementos necesarios, como papeleira para residuos caninos e bancos para o descanso.
En definitiva, pensamos que a nosa proposta contribúe a un parque canino máis amplo, seguro e tranquilo, que se integra mellor na contorna. Estamos convencidos de que podemos lograr un parque canino exemplar que satisfaga as necesidades dos cans e as suas familias e do resto da cidadanía, ao tempo que se integra de maneira harmónica no entorno. Animamos ao Concello a considerar a proposta veciñal como unha valiosa oportunidade para optimizar o proxecto inicial e construír un espazo que beneficie a toda a comunidade.
Ademais é vital explorar alternativas complementarias aos parques caninos
Vigo, ademais de ser unha cidade que promova o benestar dos cans, debe garantir que todas as persoas, tanto aquelas que teñen animais como as que non, poidan convivir en harmonía e sen dificultades. Neste contexto, é vital explorar alternativas complementarias aos parques caninos. A implementación de horarios específicos nos que os cans poidan transitar libremente por certas áreas, así como a promoción de campañas de concienciación sobre a tenza responsable e a adaptación de espazos públicos para facilitar a convivencia son algunhas das medidas que poderían enriquecer a experiencia urbana para todos os habitantes.
Unha oportunidade para Barreiro, para Lavadores, para Vigo
Vigo é a cidade con máis cans, e coa maior taxa de animais de compañía por habitante de Galicia. Apostar por infraestruturas que se adapten ás necesidades actuais reforza a súa imaxe como cidade moderna, inclusiva e respectuosa co benestar animal, ao tempo que asegura o uso equilibrado dos espazos públicos.
A comunidade de Lavadores agarda que o Concello examine con interese esta proposta, valorando a súa potencial contribución ao benestar da veciñanza.
